မန်လည်ဆရာတော်ဘုရားကြီးနှင့် လင် မယား

မြန်မာအဘိဓာန်ကြီးကို မန်လည်ဆရာတော်ဘုရား ကြီး ပြုစုသွားတော်မူမည်ဆိုပါက မယား ဟူသော စကားလုံး၏အနက်၊ လင်-ဟူသော စကားလုံး၏ အနက်ကို ဤသို့များ အနက်ဖွင့်တော်မူလေမည်လား ဟု တွေးမိလာသည်။ 

မန်လည် ဆရာတော်ဘုရားသည် မယားဟူသော စကားလုံး၊ လင်ဟူသော စကားလုံး များကို အများ သိ ထင် မြင်လွယ်အောင် စာရွှင်ရွှင်နှင့် တင်ပြဖွင့်ဆိုသွားတော်မူ၏။ ဤသို့ အနက်ဖွင့်တော် မူခြင်းမှာလည်း ဝိဂြိုဟ်ဝစနတ်၊ ပြုတုံလတ်၊ ဗျူပ္ပတ်မြော်ထောက်ချင့် ဟူသော ရှေးဆရာ မြတ်တို့ မိန့်အပ် သည့် အတိုင်း အကြောင်းအရာ၊ ဗျူပ္ပတ္တိရှုထောင့်မှ ကြည့်၍ မြင်သောအ မြင်ဖြင့် အနက်ဖွင့်တော် မူခြင်းဖြစ် ၏။ စကား တလုံးကို အဓိပ္ပါယ်ဖွင့်ဆိုသော် ရှေးဦးစွာ ယင်းစကားလုံး၏ရင်းမြစ်ကို တွေ့အောင်ရှာ။ ဤသို့ရှာပြီးမှ ဆိုလိုချက်ကို အနက်ပွင့်အောင်ဖွင့် ဤကား ရှေးဆရာမြတ်တို့၏ဩဝါဒ။ အနက်ဖွင့်နည်းနိဿသျည်းဖြစ်၏။ ဤဩဝါဒကို ဆရာစဉ်ဆက် အလေးပြု ကာ လိုက်နာကျင့်သုံးလာခဲ့ကြကုန်၏။ 

မန်လည်ဆရာတော်ဘုရားသည် မယားကို ဘယ်လိုဟာမျိုးပါလိမ့် ဟူ၍ ဗျုပ္ပတ္တိရှုထောင့်မှ ကြည့်တော်မူပြီးမှ သူ မြင်ရသောအမြင်အတိုင်း မယားကို တည်ပုဒ်ပြု၍ အနက် ဖွင့်သွားပုံကို ပဒုမပြဇာတ် တွင် စာရွှင်ရွှင်နှင့်တွေ့ရသည်ကား...

မယား-၁။ လူတို့တွင် အကြင်လင်မယားအခွင့်သာရုံ၊ ချစ်ပါကုန်သည်၊ အာရုံ အ သက်ထား၍။  ဤစကား တွင် မယားဆိုသည်မှာ...

ယောကျာ်းကျိကျိ၊ ယားချိချိနှင့်၊ ရှိသည့်ထိုအခါ၌ လွန်သာယာသည်၊ ခံသာမငြီးစေ။ လင်ယောကျာ်းတို့ အယားပျောက်အောင်၊ ရွက်ဆောင်နေ့ည၊ တမမတည့်၊ ယားကဖျောက် တတ်လေ၍။ ထို့ကြောင့်ပေ၊ လူ့ပြေရှေးအဟို အိမ်သူသက်ထား၊ ကြင်ဖေါ်များကို၊ မယား ဟူ၍ ဆို၏။

ဤကား ပဒုမပြဇာတ်လာ စကားဖြစ်၏။ အချုပ်အားဖြင့် လင်ယောကျာ်းကို အယား ပျောက် 

အောင် ဖျောက်ပေး သူ ဟုဆိုလိုသည်။ သာမန်အားဖြင့်ကြည့်သော် ယင်းဖွင့်ဆိုချက် မှာ ရိုင်းသည်ဟု ထင်ဖွယ်ရှိသော်လည်း စင်စစ်အားဖြင့် ယဉ်ကျေးသောဖွင့်ဆိုချက်(ဗျူပ္ပတ် ရှုထောင့်မှကြည့် လျှင် အဓိပ္ပါယ် ပီပြင်သော ဖွင့်ဆိုချက်)သာဖြစ်၏။

မြန်မာမှု၌ ယားဟုစကားလုံးသည် မငြိမ်မသက် ဖြစ်ခြင်းအနက်၊ လှုပ်ရှားခြင်းအနက်၊ြွကရွခြင်း အနက် ဖြစ် ၏။ ယောကျာ်းသည် သားကျွေးမှု၊ မယားကျွေးမှုအတွက် အမြဲရုန်းကန် လှုပ်ရှားနေရသူ၊ နေ့တကုတ်ကုတ် ညတကုတ်ကုတ် နေပူမိုးရွာမရှောင် အလုပ် လုပ်နေရသော အလုပ်သမား ယားနေသူဖြစ်၏။ လှုပ်ရှားရဖန် များလျှင် အယားများ၏။ များများယား၏။ အလုပ်များ(အယားများ)လျှင် ပင်ပန်း၏။ နွမ်း၏။ မောဟိုက်၏။

ထိုအခါ လင်ယောကျာ်းခများ ပင်ပန်းနွမ်းဟိုက်သည်ကို မယားခမျာက မကြည့်ရက် နိုင်သဖြင့် အမော အပန်းပြေပျောက်အောင် အယားပြေသွားအောင် ပြုစုယုယမှုအသွယ် သွယ်တို့ဖြင့် အယားဖြေပေးသည်။ လင်ယောကျာ်း အမောပြေအောင်၊ အယားပျောက် အောင် ဖျောက်ပေးသော ဗျူပ္ပတ်ကိုရှု၍ မယားဆိုသည် မှာ ယောကျာ်းကျိကျိ၊ ယားချိချိ နှင့် ရှိသည့်ထိုအခါ၌ ဟူ၍ ဆရာတော်ဆိုသတည်း။

ဆရာတော်သည် မယားကို အနက်နှစ်မျိုး ဖွင့်ဆိုထား၏။ လင်ကို အယားဖြေတတ် သူ၊ ကိုယ်တိုင်လည်း ယားနေသူ၊ ယင်းနှစ်မျိုးတွင် ဒုတိယအနက်ကို ပဒုမပြဇာတ်၌ ဖွင့်ဆို ပြန်သည်ကား...


မယား-၂။ သူတို့ကလည်း အလိုကြီးမား ယောကျာ်းပေါ်မှာ တကြောသာအောင်၊ သေပါလုလု ယားရှင့်။ သည်ကြောင်းကျားကြောင့်၊ မယားခေါ်ကြဆို ယားလည်းယားတတ်။ ယားစေတတ်သည် ပညတ်များ ထိုထိုတည်း။

ဤစကားအရ ကောက်ချက်ချသော် သူတို့ကိုယ်၌ကလည်းယားသောကြောင့် မယား ဟု စာရွှင်ရွှင်နှင့် တင်ပြသွားခြင်းဖြစ်သည်။

သို့သော် မယားသည် ဘာကို ယားသနည်း။ ဘာတွေ ဘာတွေက ယားယားနေသနည်း။ စဉ်းစားလျှင် အိမ်တွင်းမှုလုပ် သိမ်းထုပ်သေချာ။ မိစ္ဆာကြဉ်ရှောင်ဟူသော မယားဝတ်ငါးပါးကို ညွှန်ထား၍မရပေ။ အိမ်တွင်းမှုလုပ်ဟူသော စကားဖြင့် အလုပ်များကြောင်း ကိုဆိုသည်။ အလုပ်များခြင်းသည် မိန်းမတို့၏ လှုပ်ရှားခြင်း၊ ယားခြင်းပင်တည်း။ အလုပ် များသောနေရာတွင် မိန်းမများက ယောကျာ်းများထက် သာလေ သည်။ အလုပ်များသော ကြောင့် အလုပ်မြန်မြန်ပြီးဖို့အတွက်လည်း ယောကျာ်းထက် ဆန္ဒစောကြလေ သည်။ အလို ကြီးကြသည်။ ဤသည်ကို ရည်၍သာ မန်လည်ဆရာတော်ဘုရားက...
 

သူတို့ကလည်း အလိုကြီးမား ယောကျာ်းပေါ်မှာ၊ တကြောသာအောင် သေပါလုလုယားရှင့်။ ဟု စပ်ဆို သတည်း။ တလှုပ်ရှားရှား အလုပ်များခြင်းကို ယားသည်ဟု ဆိုသည်။ 

ထိုယားခြင်းမျိုးကား ယောကျာ်းများထက် ပို၍ယားသည်။ ပို၍အလုပ် များသည် ကိုယ်တိုင်ယားနေသော အယားများကို မယားအောင်၊ အယားပြေအောင် ဖြေ ဖျောက်တတ်သောကြောင့်  မယားခေါ်သည်ဟု  ဒုတိယအနက်  ဆက်၍  မန်လည်ဆရာ တော် ဖွင်သတည်း။
၎င်းပြင် လင်ဟူသောဝေါဟာရကိုလည်း ပီပီပြင်ပြင် စကားရွှင်ရွှင်နှင့်ပင် အဘိဓာန် ဖွင့်သွားတော်မူ၏။ ဘယ်လိုသတ္တဝါမျိုးကို လင်ခေါ်လေသနည်း။ ပဒုမပြဇာတ်မှာပင် လင် ဟူသောစကားလုံး၏အနက်ကို သဘောပေါက်လွယ်အောင် ကောက်ခါငင်ကာ ဖွင့်ထားခဲ့ သည်ကား-

လင်။ ။ယောကျာ်းကို လင်ဆိုသည်မှာကား ထိုမယားတို့ အယားစိတ်ဝင်၊ ယားမရွှင် က ကြည်လင်စေသော အားဖြင့် တကားကားနှင့်ယောကျာ်းဓမ္မတာ နေ့နေ့ညည၊ ထိုကိစ္စကို လုံ့လပြုတတ်ရှာ၍ လင်ဟူပါသည်။ လူ့အခေါ်မှတ်ကြ။
အလုပ်မအားအောင် များနေ၍ ပင်ပန်း၍ ဝတ်ချင် စားချင်၍ ပွဲလမ်းသဘင်သွား ချင်၍ စိတ်လက်မရွှင် မကြည်လင်ဖြစ်နေသော မယားကို (ဝါ) ဟိုသင်းကြောင့် ယားရ၊ သည်သင်းကြောင့်ယားရနှင့်တကိုယ်လုံး ယား၍ မကြည်မလင် ဖြစ်နေသော မယားကို ကြည်လင်စေတတ်သောကြောင့် လင်ယောကျာ်း ဖြစ်သူသည် မယားတယောက် ဝမ်း မြောက်ကြည်လင်၍ တရွှင်ရွှင်ဖြစ်နေစေရန်အတွက် နေ့ညမရှောင် အလုပ်လုပ် ရ သည်။ ထိုကြောင့် ယောကျာ်းကို လင်ဟုခေါ်ကြောင်းကို ဆိုသည်။ တဖန် လင်နှင့်မယားတို့၏ အညမည သဘောကို ဆရာတော်က ဆက်၍ ပြောပြန်သည်မှာ-
 

မယားနှင့်လင်၊ ပျော်ပါးရွှင်သည်၊ ဝမ်းတွင်တောင့်ပါမှ။ ဝမ်းမဝ၍ မထနိုင်ကြလျှင်၊ ထိုယောကျာ်းလည်း မယားနိုင်ကြ၊ မယားကလည်း  မိန်းမယားမြဲ မယားနိုင်ပဲ သည်လင်လဲ မလင်ချင်ဘူး}}

လင်မယားနှစ်ယောက်၏ပျော်ရွှင်မှု၊ စိတ်နှလုံးချမ်းမြေ့မှု၌ အဓိကအချက်မှာ ဝမ်း ရေးဖြစ်လေသည်။ အူမçတောင့်ဖို့အရေးကြီးသည်။ လူလောကတွင် အူမတောင့်တောင့်နှင့် မကြောင့်မကြ နေနိုင်ရေးအတွက် မယားကလည်း မယားအလျောက်။ လင်ကလည်း လင့် အလိုက် ထိုက်ထိုက်တန်တန် လင်တထမ်း၊ မယားတရွက်ဆိုသကဲ့သို့ အလုပ်လုပ်ကြရမည်။ လင်နှင့်မယား နှစ်ယောက်စလုံး မလုပ်မကိုင်ပဲ ထိုင်နေမည်ဆိုသောမယားလည်း ယားနိုင် မည်မဟုတ်။ လင်လည်း လင်နိုင်မည်မဟုတ်။

ထို့ကြောင့် ယားနိုင်၊ လင်နိုင်လာအောင် မယားကလည်း မယားနှင့်တန်သောအ လုပ်ကို လုပ်၊ လင်ကလည်း လင်နှင့်တန်သောအလုပ်ကို ယောကျာ်းတို့၏ဇွဲမာန်ဖြင့် မတွန့် မဆုတ် ကြိုးစား၍ လုပ်ကြ။ ကိုယ်စီကိုယ်ငှ အလကားမနေပဲ ယားကြဟုဆိုလိုသည်။

မန်လည်ဆရာတော်ဘုရားကြီး၏  လင်မယားအဘိဓာန် အနက်ဖွင့်ဆိုချက်များမှာ သာမန်အားဖြင့်ကြည့်လျှင် ရွှင်သောစာ၊ စာရွှင်ဟုမြင်စေသည်။ မြင်ကြသည်။ အတွင်းသို့ လှိုက်၍ အနှစ်သာရကို နှိုက်ယူသောအခါ လင်တထမ်း၊ မယားတရွက် ၂-ယောက်စလုံး အလုပ်လုပ်ကြ။ အလုပ်အကိုင်ရှိမှ လူရိုသေမည်။ လေးစားကြ မည်။ လောကအလယ်တွင် တင့်တောင့်တင့်တယ် နေနိုင်ကြမည်ဖြစ်၏။ ထို့ကြောင့်...

လင်ဖြစ်သူက လင့်ဝတ္တရားအရ မယားစိတ်ရွှင်အောင်၊ ကြည်လင်အောင် ဆောင်ရွက်ရမည်။ မယား ယူ ထားလျှင် မယားကို နှလုံးစိတ်ဝမ်း၊ ချမ်းသာစွာ ထားနိုင်အောင် အ လုပ်ကို ကြိုးစားလုပ်ရမည်။
 

မယားကလည်း အလုပ်လုပ်ရသဖြင့် ပင်ပန်းလာသောလင်၊ မောဟိုက်လာသောလင် အလုပ်များ၍ ယားလာသောလင်ယောကျာ်းကို မယားကျင့်နှင့်အညီ ပြုစုယုယ ကျွေးမွေး ခြင်းအားဖြင့် အယားပြေအောင် ဖြေပေးရမည်။ အယားပျောက်အောင် ဖျောက်ပေးရမည်။

ဤသည်သာလျှင် လင်မယားအဘိဓာန်၏ အနှစ်သာရဖြစ်သတည်း။

စကားစပ်၍ ဦးပုည၏စာရွှင်ကို တင်ပြလိုသည်။ ဦးပုညသည် တောလမ်းခရီးသွား တဦး၏အမြင်ဖြင့် လင်းယုန်မောင်နှံ ကဗျာတပုဒ်ကို ရေးလိုက်ရာ ထိုကဗျာ၏အသွင်ကို အများအားဖြင့် ရိုင်းသည်ဟု မြင်ကြ၏ ထိုသည် အရိုင်းကဗျာကား...
 

ထောက်ကြံ့ငယ်-ဟိုချုံ။ ကိုင်းခွဆုံက၊ လင်းယုန်မောင်နှံ၊ ရောဂါကင်းအောင်၊ အ နင်းခံလို့၊ လူဟန်အသွင်၊ သည်ပုံကို မြင်သောခါ၊ မခင်တို့သက်ဝေမှာ၊ အကြောတွေအကုန်ရုန်းလို့၊ ကုံးခဲ့ပြီလေး

ဤကဗျာကို ရိုင်းသည်ဟုမြင်ကြသည်။ မြင်လည်းမြင်ထိုက်ပေသည်။ ရိုင်းသောအ သွင်က ထင်းထင်း ကြီး ပေါ် လွင်နေသည်ကိုး။

ယင်းကဗျာကိုပင် အယဉ်ရှုထောင့်မှ ကြည့်လျှင်လည်း ဖြောင့်နေ၏။ ခရီးယောကျာ်း သည် ခရီးပန်း၍နွမ်းနေ စဉ် ထောက်ကြံ့ပင်ပေါ်မှ လင်းယုန်မောင်နှံကို လှမ်းကြည့်လိုက်ရ သောအခါ ဪ-သူတို့ခမျာ ချမ်းသာပေ စွ။ ငါ့မှာဖြင့် တမတ်စောက်စောက်နှင့်နေပူ ကျဲ တောက်တောက်ကြီး ထဲမှာ လျှောက်နေလိုက်ရတာ ခြေသ လုံးကြောတွေတောင် ရုန်းကုန်ပြီ ဤသို့မြင်လျှင်မူကား ထိုကဗျာအသွင်မှာ ယဉ်မည်ဖြစ်သတည်း။ ရှိစေတော-

အချုပ်အားဖြင့် ရွှေတိဂုံစေတီတော်ကြီးကို ရှုထောင့်လေးဘက်မှ ကြည့်လျှင် အသွင် တမျိုးစီမြင်ရမည်ဖြစ် ၏။ မြောက်ဘက်ရှုထောင့်မှ ကြည့်သော် အာဇာနည်ဗိမာန်ပါလာ မည်။ တောင်ဘက်မှ ရှုသော် ခြင်္သေ့ကြီး ၂-ကောင် ပါလာမည်ဖြစ်၏။

ထို့အတူ မန်လည်ဆရာတော်ဘုရား၏ လင်မယားအဘိဓာန် ဖွင့်ဆိုချက်ကို အရိုင်း ရှုထောင့်မှ ကြည့် လျှင် လည်း ရိုင်းလိမ့်မည်။ ယဉ်သောရှုထောင့်မှ ရှုလျှင်ကား ယဉ်ပါးသော အသွင်ကို မြင်ရမည်ဖြစ်သတည်း။